काठमाडौं फनपार्क प्राइभेट लिमिटेडले थानकोटको गोदामचौरदेखि चन्द्रागिरिसम्म पुग्ने केबल कार निर्माणको ९० प्रतिशत काम सम्पन्न गरेको छ। आगामी वैशाखदेखि सर्बसाधारणलाई केबलकार मार्फत् चन्द्रागिरिमा पुर्याउने, निर्माण कम्पनीको योजना छ।
लगानीकर्ता तथा कम्पनीका निर्देशक अम्बिका प्रसाद पौडेलले भने, ‘वैशाखदेखि सर्बसाधारणलाई चन्द्रागिरिमा केबलकार मार्फत् पुर्याउने हाम्रो योजना भएपनि नाकाबन्दीको असरले गर्दा अलि ढिला होला जस्तो छ। तर टेस्ट राइड चाहिँ जसरी भएपनि वैशाख १ मै गर्ने योजना बनाएका छाैँ।’
भूकम्प र नाकाबन्दीको कारण प्रभावित भएको चन्द्रागिरि केबल कार निर्माण केही समय यतादेखि पुनः संचालन भएको छ। नाकाबन्दीको कारण केबलकारको रोप लामो समय भारतीय नाकामा नै अड्किएको थियो। नाकाबन्दी खुलेपछि भने निर्माण कम्पनीले बिदेशबाट कामदार ल्याई कार्य सुरु गरेको छ। विदेशी कामदारहरुले अहिले रोप झुण्डाउन थालिसकेका छन्।
२१ महिना अघिबाट निर्माण सुरु गरेको कम्पनीले नाकाबन्दी र भूकम्पको समयमा कैयन काम थाती राखेको थियो। गोदाममा बन्दै गरेको बटम स्टेशनको अहिले निर्माण कार्य धेरै नै सकिएको छ। बटम स्टेशनमा रेष्टुरेन्ट पनि राख्ने कम्पनीको योजना छ। चन्द्रागिरिमा बन्दै गरेको मन्दिर, इन्टरटेनमेन्ट थिएटर, बार र ल्यान्डीङ स्टेशनको धेरैजसो काम सकिएको पौडेलले जानकारी दिएका छन्।
केबलकारका बक्स अर्थात् गोन्डाला कम्पनीले ल्याएको चार महिना बितिसकेको छ। तर नाकाबन्दीको कारण काम अघि नबढेपछि अहिलेसम्म गोन्डाला झुण्डाउन सकिएको छैन। काठमाडौं फनपार्क प्राइभेट लिमिटेडले चन्द्रागिरिमा रहेको जग्गा नेपाल सरकारबाट ४० वर्षको लागि भाडामा लिएको छ। तर गोदाममा बन्दै गरेको बटम स्टेशनको जग्गा भने कम्पनी आफैँले खरिद गरेको हो।
पौडेलका अनुसार २०६६ सालमा चन्द्रागिरिमा केबल कार लैजाने योजना सहित काठमाडौं फनपार्क प्राइभेट लिमिटेडको गठन भएको थियो। तर यसले ५ वर्ष भने सरकारबाट अनुमति लिनै बिताएको थियो। पौडेलले भने ‘काठमाडौँ बासीका लागि अहिले थकान भुलाउने कुनै ठाउँ नै छैन, थकान भुलाई मनोरञ्जन दिन सकियोस् भनेर हामीले चन्द्रागिरिमा केबल कार लैजाने योजना बनाएका थियाैँ। ’
चन्द्रागिरिबाट सगरमाथादेखि तराइको भू–भागसम्म दृश्यावलोकन गर्न सकिने पौडेल बताउँछन्। साथै चन्द्रागिरिलाई धार्मिक स्थलको रुपमा समेत परिणत गर्न लागेको छ। चन्द्रागिरिमा रहेको भालेश्वर महादेव क्षेत्रमा अहिले कम्पनीले मन्दिर निर्माण गरिरहेको छ। केबलकार बाहेक पैदलमार्ग मार्फत् जाने भक्तजनहरुका लागि समेत मन्दिर दर्शन गर्ने सुविधा रहेको पौडेल बताउँछन्।
हिन्दु धर्मग्रन्थका आधारमा, महादेवले सतिदेवीको शव बोेकेर हिँडिरहेका समयमा चन्द्रागिरिमा सतिदेवीको निधार खसेको स्थनीयबासीको विश्वास छ। साथै पृथ्वी नारायण शाहले चन्द्रागिरिमा आएर पानी माग्ने गरेको कथन भएको पनि स्थानीयबासी बताउँछन्। उनले मकवानपुर ससुराली गएका बेलामा चन्द्रागिरिको डाँडाबाट काठमाडौं हेरेपछि नै काठमाडौंलाई पनि एकिकरण गर्ने योजना बनाएको इतिहासविद्हरुको भनाई छ ।
यसअघि पनि मानिसहरु चन्द्रागिरिमा पुजाआजा गर्न जाने गरिरहेका छन्। तर अब भने भक्तजनहरुलाई केलबकार मै चन्द्रागिरिसम्म पुर्याउने कम्पनीको योजना हो। तर गोदामचौरबाट चन्द्रागिरिसम्म केबलकारमा पुग्न के कति शुल्क लिने भन्ने बिषयमा कम्पनीले अहिलेसम्म कुनै टुङ्गो लगाएको छैन। मन्दिरका साथै त्यहाँ रमाइलो गर्न जानेका लागि निर्माण कम्पनीले अत्याधुनिक इन्टरटेनमेन्ट हल निर्माण गरेको छ। साथै चन्द्रागिरिबाट १ सय ८० डिग्रीमा देखिने हिमालपनि आगन्तुकहरुको आकर्षणको केन्द्र बन्ने पौडेलको दाबी छ। चन्द्रागिरिबाट काठमाडौं तथा ललितपुर र भक्तपुरको बस्तीको समेत अबलोकन गर्न सकिन्छ।
गोदामचौरबाट अहिले चन्द्रागिरिसम्म पुग्न सार्वननिक सवारी साधनमा झन्डै एक घन्टा लाग्छ। तर केबलकारमा भने गोदामचौरबाट चन्द्रागिरिसम्म पुग्न ९ मिनेट लाग्ने कम्पनीको दाबी छ।चन्द्रागिरि समुद्रसतहबाट २५ सय ४० मिटर उचाइमा छ। जसले गर्दा यहाँबाट मौसम राम्रो भएको समयमा हिमालहरु देख्न सकिन्छ। साथै हिमाल नै दृश्यावलोकन गराउने उद्देश्यका साथ कम्पनीले चन्द्रागिरिमा ‘भ्यू टावर’ समेत निर्माण गरिरहेको छ।
दैनिक १० हजारसम्म मानिसहरुलाई सेवा पुर्याउन सकिने गरी केबल कार सञ्चालन गर्न लागिएको पौडेलले जानकारी दिएका छन्। कम्पनीले मानिस चढ्ने ३८ वटा गोन्डाला र तीनवटा सरसामान बोक्ने गोन्डाला जडान गर्न लागेको जनाएको छ। निर्माण कम्पनीले चन्द्रागिरिमा होटल तथा रिसोर्ट पनि निर्माण गर्न लागेको छ। तर भूकम्पको कारण प्रभावित भएकाले होटल तथा रिसोर्टको अहिलेसम्म निर्माण कार्य थालनी हुन सकेको छैन।
लोडसेडिङको समयमा जेनेरेटर मार्फत् केबुलकार सञ्चालन गर्ने कम्पनीको योजना छ। थानकोट प्रहरीचौकी नजिकबाट चित्लाङ जाने बाटोतर्फ करिब ३ मिनेट जति सवारी साधनमा गएपछि केबुलकारको बटम स्टेशनसम्म पुग्न सकिन्छ।
तस्विरः भरतबन्धु थापा
स्रोत: सेतोपाटि
