भाद्र ५, २०७३- काठमाडौंको थानकोटबाट रमणीय चन्द्रागिरी डाँडामा पुग्नको लागि निर्माण गरिएको केबलकार आंशिक सञ्चालनमा आएको छ । दुई सातापछि पूर्ण सञ्चालनमा आउने चन्द्रागिरी हिल्स प्रालिले जनाएको छ । अहिले बिहान ९ देखि अपराह्न ५ बजेसम्म मात्रै केबलकार सञ्चालन भइरहेको छ ।
व्यावसायिक रूपमा सञ्चालनपछि दैनिक १० हजारलाई चन्द्रागिरी पुर्याउने उद्देश्य प्रालिले जनाएको छ । आन्तरिक तथा बाह्य पर्यटक लक्षित गरी निर्माण गरेको केबुलकारबाट हाल दैनिक एक हजारले ओहोरदोहोर गरिरहेका छन् । एक यात्रुको दोहोरो सात सय भाडा छ । फाखेल, चित्लाङ, थानकोटलगायत क्षेत्रका स्थानीयवासी, अपांग र वृद्धवृद्धालाई २५ देखि ६० प्रतिशतसम्म छुट दिइएको छ ।
११ वटा पोल भएर थानकोटबाट चन्द्रागिरी पुग्ने केवुलकारको कुल लम्बाइ २.४ किलोमिटर हुनेछ । जसबाट आठ मिनेटमा चन्द्रागिरी डाँडो पुगिनेछ । अहिले फटाफट पैदल हिँड्नेलाई चन्द्रागिरी पुग्न दुई घण्टाभन्दा बढी समय लाग्छ ।
११ मध्ये एउटामा एउटा पोलदेखि अर्को पोलसम्मको दूरी नौसय मिटर छ । जसले गर्दा केबलकारमा यात्रा गर्ने यात्रुलाई 'थ्रीलिङ' अनुभव गराउँछ,' उनी भन्छन्, 'यात्रुले केबलकार चढ्दा रोमान्चसँगै रमाइलो अनुभव गर्नेछन् ।'
महालंगुर हिश्रृंखलादेखि अन्नपू्र्ण हिमश्रृंखालसम्म हेर्दै रिसोर्टमा बसेर मजा लिन सक्नेछन् । आकाश खुलेका बेला यहाँबाट हिमालदेखि तरार्इसम्म देखिन्छ । अझ रमाइलो त के छ भने कहिले बादल भित्र त कहिले बादलमाथि हुँदै केबलकारमा सरर उक्लनु र ओर्लनुको मजै बेग्लै छ ।
फनपार्क प्रालिको लगानीमा केबुलकार र भालेश्वर मन्दिरको निर्माण सम्पन्न भए पनि होटल र रेस्टुराँको निर्माण कार्य भने सकिएको छैन । ‘त्यसैले आंशिक रूपमा सञ्चालन गरिएको हो,’ प्रालिका महाप्रबन्धक अभिषेक शाहले भने, ‘होटल र रेस्टुराँको निर्माण सकिएलगत्तै पूर्ण रूपमा सञ्चालनमा ल्याउँछौं ।’ ऐतिहासिक, धार्मिक र पर्यटकीय महत्त्व बोकेको केबलकारसँगै रक क्लाइम्बिङ, जिप फ्लायर, प्याराग्लाइडिङ र बुटिक होटल सञ्चालन गरिने जनाएको छ । खर्चालु पर्यटकहरूलाई लक्षित गर्दै पाँच तारे स्तरको बुटिक होटल सञ्चालनमा ल्याउने तयारी भइरहेको छ ।
अस्ट्रियाको आधुनिक ‘डोपलमेयर’ कम्पनीबाट केबुलकार आयात गरी ३ अर्ब २५ करोडको लागतमा निर्माण गरिएको हो । यसको लागत अझै बढ्ने कम्पनीले जनाएको छ ।
नेपाल आउने कुल विदेशी पर्यटकमध्ये ३० देखि ४० प्रतिशतलाई चन्द्रागिरी पुर्याएर उनीहरूको बसाइ एक दिन लम्याउने कम्पनीको उद्देश्य छ । ‘जंगलबीच रोमाञ्चित हिमालदेखि तराईसम्म देखिने चन्द्रागिरीमा बोटानिकल गार्डेनमा समेत रमाउन सकिने व्यवस्था गर्न लागेका छौं,’ शाहले भने, ‘फुलस्पिडमा केबुलकार सञ्चालन भएपछि मकवानपुरको चित्लाङ र मार्खु गाविसमा पनि स्वदेशी एव विदेशी पर्यटकहरूको बास हुनेछ ।’ केबुलकारको तल्लो स्टेसन ६ हेक्टर जमिनमा फैलिएको छ भने माथिल्लो स्टेसनका लागि सरकारसँग ३६ हेक्टर जमिन लिजमा लिएको छ ।
थानकोटबाट चन्द्रागिरी ४ दशमलव २ किलोमिटरमा केबुलकारका ११ वटा टावरहरू निर्माण गरिएका छन् । केबुलकारमार्फत ८ मिनेटमा थानकोटबाट चन्द्रागिरी डाँडामा पुगिन्छ । थानकोटबाट चन्द्रागिरी हिँडेर जानका लागि साढे २ घण्टा लाग्छ । थानकोटदेखि चन्द्रागिरी डाँडासम्म ३८ वटा क्याबिन (गोन्डोला) राखिएका छन् । ‘एउटा क्याबिनमा ८ जना अट्ने क्षमता हुन्छ,’ सञ्चालकले भने । प्रतिघण्टा एक हजार यात्रु आवत–जावत गर्ने क्षमता उक्त केबुलकारको रहेको छ ।
तस्बिरहरु: किरण पाण्डे, निमेषजंग राई र अंगद ढकाल
No comments:
Post a Comment